Uruganda rwa Kirehe Rice ruri mu Karere kacu, ruherereye mu Murenge wa Kirehe, Akagari ka Nyabigega rwatangiye gukora mu 2013. Rufite ubushobozi bwo gutunganya toni enye(4) z’umuceri udatonoye mu isaha imwe. Mu gihe rwakira umusaruro w’umuceri ugera kuri Toni 3,500 mu gihembwe kimwe cy’ihinga; rukaba rwarabereye benshi isoko y'iterambere kubera kugura umusaruro no gutanga akazi.

Uru ruganda rw’umuceri, ni rwo rugura rukanatunganya umusaruro w’umuceri wose wera mu Karere kacu, wezwa n’abahinzi bibumbiye mu makoperative arimo COOPRIKI-Cyunuzi[Iyi irimo n’abahinzi bo mu karere ka Ngoma], CORIMU-Kirehe, ISABANE[Nyarubuye] na MUSHIKIRI RICE GROWERS.

Umuyobozi w'uruganda rwa Kirehe Rice Niyirora Emmanuel akomoza muri make ku nzira bicamo ngo umuceri utunganyije uboneke, yagize ati: “Dufite imashini zikora ku buryo bw’uruhererekane hari igosora umuceri, ihereza ikuraho ibishishwa, nayo igahereza itora amabuye, iyo nayo igahereza ikuraho ‘Son de riz’ , igahereza iwugira umweru cyane, igosoramo umenetse;… kugeza usohotse umeze neza.”

Akomeza agira ati: “Ubufite umushinga wo kubyaza amakara azwi nka ‘Briquettes’ mu bishishwa by’umuceri uratangira gushyirwa mu bikorwa vuba aha.”

Uruganda rwa Kirehe Rice, uretse kugura umusaruro w’abahinzi b’umuceri no kuwutunganya, ni n’isoko y’akazi ku bantu mu byiciro bitandukanye aho rufite abakozi bahoraho 17, rugakorana na koperative ya ba Karaningufu igizwe n’abantu 30; ndetse n’Abagoronome barindwi(7) bakurikirana umuceri muri za koperative ruwugurira.

Umucungamutungo w’uruganda rwa Kirehe Rice, Murebwayire Devotha ni umwe mu batanga ubuhamya bw'uburyo rwamubereye amahirwe y'akazi ubu amazemo imyaka irindwi kandi kamubereye isoko y'iterambere ritandukanye, ati: “Ni uruganda rwangiriye akamaro kenshi kuko nabonyemo akazi kandi byaramfashije mu mibereho yanjye bwite n’umuryango wanjye, hari n'ubumenyi bwinshi nahungukiye.”

Uruganda rwa Kirehe Rice rucungwa ku bufatanye bwa Leta, Abikorera ndetse n’abahinzi b’umuceri bafitemo imigabane.