Siporo rusange yo kuri iki Cyumweru tariki 07 Ukuboza 2025, mu Karere kacu yahujwe n'ubukangurambaga bukomeje bw'iminsi 16 yo kurwanya ihohotera rishingiye ku gitsina. Ni siporo yitabiriwe n'Abayobozi mu Karere abafatanyabikorwa, urubyiruko n'abahatemberera babyukiye muri siporo rusange igamije kwimakaza ubuzima bwiza mu batuye Akarere, Siporo ivura amavunane, igatuma ingingo zose z'umubiri w'umuntu zikora neza yanatangiwemo ubutumwa bwo kurwanya ihohotera.

Ni siporo yitabiriwe n'Umuyobozi w'Akarere wungirije ushinzwe iterambere ry'Ubukungu Bwana Nzirabatinya Modeste, Umuyobozi w'Akarere wungirije ushinzwe imibereho myiza y'abaturage Madame Mukandayisenga Janviere, inzego z'umutekano, abafatanyabikorwa batandukanye; n'abatuye mu bice by'imirenge ya Kirehe na Kigina. 

Umuyobozi w'Akarere wungirije ushinzwe iterambere ry'ubukungu Bwana Nzirabatinya Modeste, yashimiye abitabiriye siporo, abasaba ko habaho ubufatanye siporo ikajya ikorwa na buri wese kandi ikaba umuco. Yibukije abitabiriye gukumira no kurwanya ihohotera rishingiye ku gitsina, aho yagize ati: “Ubukangurambaga bwo kurwanya ihohotera rishingiye ku gitsina ni gahunda ya buri munsi, ni ukugira ngo twibukiranye amategeko, twibukiranye ibihano, twibukiranye n'ingaruka; ariko turanavuga cyane ku gukumira ihohotera rishingiye ku gitsina gutanga amakuru.”

Yanatanze ubutumwa bushishikariza buri wese kugira isuku, ababwira ko kugira isuku ari ubuzima, abasaba kugira isuku aho bari hose ikaba umuco.

Abitabiriye siporo bafashe umwanya wo kwipimisha indwara zitandura. Iyi siporo yanakorerwe hirya no hino mu mirenge yose igize Akarere.