MU KARERE HARI GUKORWA UBUKANGURAMBAGA BUGAMIJE KUZAMURA UMUSARURO W'UBUHINZI MU BYANYA BY'UBUHINZI/FOBASI

Guhera kuri uyu wa Kabiri tariki 05 Gicurasi 2026, Ubuyobozi bw’Akarere ku bufatanye n'Ikigo cy'Igihugu gishinzwe iterambere ry'ubuhinzi n'ubworozi hatangijwe ubukangurambaga bwo kuzamura umusaruro w’ubuhinzi mu byanya by’ubuhinzi/FOBASI, igikorwa cyatangiriye mu Murenge wa Mpanga kiyobowe n’Umuyobozi w’Akarere Bwana Rangira Bruno ari kumwe n'Umuyobozi w'Akarere wungirije ushinzwe iterambere ry'ubukungu, nabafatanyabikorwa batandukanye mu by'ubuhinzi.

Ubu bukangurambaga buri mu rwego rwo guteza imbere ishoramari mu buhinzi mu karere, ⁠gutegura no gukurikirana ibihingwa, gutegura neza umusaruro; buzagera mu mirenge yose. Abayobozi, Abahinzi, na Koperative barebera hamwe ibyatuma umusaruro wiyongera.

Mu gutangiza ubu bukangurambaga mu Murenge wa Mpanga, Umuyobozi w'Akarere Bwana Rangira Bruno yasabye abahinzi kumva neza gahunda y'Igihugu, atanga inama yo guhinga ibihingwa byatoranyijwe bakurikiza amabwiriza no gutegura ububiko bw'umusaruro; yibutsa ko ibi byose nibikorwa kinyamwuga nta kabuza umusaruro uziyongera mu buryo bugaragara.

Muri ubu bukangurambaga hasuwe umuhinzi w'intangarugero witwa Habimana Emmanuel uhinga mu cyanya cyuhirwa cya Mpanga asobanurira abandi ibanga yakoresheje, aho ubu ageze ku rwego rwo kweza toni 9 z'ibigori kuri hegitari imwe.