Mu mpera z'iki cyumweru dushoje, ku biguga bya Rusumo High school na Ruhanga mu Murenge wa Kigina hashorojwe imikino yo mu marushanwa y'abarimu yaberaga hirya no hino mu mirenge, ku nsanganyamatsiko igira iti: “Twite ku buzima bwiza bwo mu mutwe mu mashuri”.

Ku wa Gatandatu tariki 21 Kamena 2025, Umuyobozi w'Akarere wungirije ushinzwe imibereho myiza y'abaturage Madame Mukandayisenga Janviere ari kumwe n'Abayobozi mu nzego z'Umutekano n'Abanyamabanga Nshingwabikorwa b'imirenge bayoboye imikino isoza amarushanwa y'Abarimu yari imaze ukwezi ikinirwa mu mirenge muri volleyball na Football amakipe y'Abagore n'amakipe y'Abagabo.

Umuyobozi w’Akarere wungurije ushinzwe imibereho myiza y’abaturage Madame Mukandayisenga yashimye imigendekere myiza y’aya marushanwa, ashimira amakipe yageze ku mikino ya nyuma, asaba abarimu kwita ku buzima bwiza bwo mu mutwe, bahereye kuri bo ubwabo, abanyeshuri, no mu baturage.

Ati: "Iyi mikino inyuranye yakinwe n’abarimu, navuga ko yageze ku ntego yayo. Ubu mbere yo kwigisha umwana abarimu babanza kumenya ikibazo yaba afite ku buryo kibanza kikabonerwa umuti, ku bufatanye n’ababyeyi be. Kuba twarabinyujije mu marushanwa y’abarimu ni uburyo bwiza bwo gutuma nabo babasha kubyiyumvamo. Iyi mikino rero icyo navuga yatanze umusaruro.”

Yasabye abitabiriye iyi mikino bose gukomeza kwita kuri gahunda zo mu minsi 100 yo kwibuka ku nshuro ya 31 Jenoside yakorewe Abatutsi mu 1994. Asaba abanyeshuri kuzitwara neza mu bizamini bisoza ibyiciro bitandukanye, no kuzitwara neza mu kiruhuko, bose bakita ku buzima bwiza bwo mu mutwe.

Aya marushanwa y’amakipe y’abarimu yayegukanye mu mukino wa Volleyball abagore ryegukanwe n’Umurenge wa Nyamugari, abagabo ryegukanwe n’Umurenge wa Kigina. Naho muri Football mu bagore igikombe cyatwawe n’Umurenge wa Mushikiri, abagabo cyegukanwa n’Umurenge wa Musaza. Hagiye hahembwa amakipe atatu ya mbere muri buri cyiciro. 

Abarimu bashimiye iyi gahunda y'imikino hagati yabo nk'uko Uwayezu Valentine wigisha ku kigo cy’amashuri abanza cya Gahara, yabivuze ati: “Buriya imikino ni kimwe mu bituma umuntu yumva aruhutse mu mutwe kandi akabasha kwisanzura ku wo bari kumwe mu buzima bwa buri munsi. Ku kigo nigishaho, ubuzima bwo mu mutwe tuburebaho cyane kubera ko tugerageza kuba inshuti y’umwana, ku buryo ugize imyitwarire idasanzwe irimo kwigunga tumuganiriza tukamenya ikibazo afite.”