Kuri uyu wa Gatanu, hirya no hino mu Karere kacu habaye igikorwa cyo kwibuka ku nshuro ya 31 Jenoside yakorewe Abatutsi mu 1994 ku rwego rwa buri kigo nderabuzima, mu bigo nderabuzima byose biri mu Karere kacu.

Mu rwego rwo gukomeza kwibuka ku nshuro ya 31 Jenoside yakorewe Abatutsi mu 1994, kuri uyu wa ya 23 Gicurasi 2025,Umuyobozi w'Akarere wungirije ushinzwe imibereho myiza y'abaturage Madame Mukandayisenga Janviere ari kumwe na Perezida wa IBUKA mu Karere n'umuhuzabikorwa wa DASSO mu karere bifatanyije n'abarezi n'abanyeshuri b'ikigo cya GS Bisagara basuye urwibutso rwa Nyakarambi ndetse n'ubuyobozi n'abakozi b'ibigo nderabuzima bya Kigina na Kirehe mu gikorwa cyo kwibuka abari abakozi, abarwayi n'abarwaza bishwe muri Jenoside. 

By'umwihariko mu karere hose, uyu munsi hakozwe igikorwa cyo kwibuka  mu bigo nderabuzima.

Ku rwibutso rwa Jenoside rwa Kirehe i Nyakarambi, igikorwa cyo kwibuka abari abakozi, abarwayi n'abarwaza mu bigo nderabuzima bya Kigina na Kirehe cyabimburiwe no kunamira ko gushyira indabo ku rwibutso rwa Jenoside rushyinguyemo imibiri isaga ibihumbi 12 y'abatutsi  bishwe muri Jenoside yakorewe Abatutsi mu 1994, no gusura urwibutso.

Umuyobozi w'Akarere wungirije ushinzwe imibereho myiza y'abaturage Madame Mukandayisenga Janviere, yasabye abitabiriye igikorwa kurangwa n'ubumuntu, kurwanya ingengabitekerezo ya Jonoside, kwirinda amacakubiri, ivangura, irondabwoko n'irondakarere ahubwo bakimakaza gahunda ya Ndi Umunyarwanda.

Ku rwego rwa buri kigo nderabuzima kandi bagiye bategura ibikorwa byo kuremera bamwe mu barokotse Jenoside yakorewe Abatutsi mu 1994, mu rwego rwo kwifatanya nabo muri ibi bihe byo kwibuka.