Ku bufatanye bw'Akarere n'Ikigega cyihariye cy'ingoboka, hatangijwe umushinga wo gucukura umuringoti uzaba ureshya n'ibirometero 30 uzacukurwa mu bice by'imirenge ya Mpanga na Mahama bikikije ikibaya kinyuramo umugezi w'Akagera hagamijwe gukumira imvubu zava muri uwo mugezi zikonera abaturage.

Ni umushinga watangijwe ku mugaragaro kuri uyu wa Gatandatu tariki 28 Kamena, mu Kagari ka Saruhembe, Umurenge wa Mahama, mu bikorwa byitabyiriwe na Guverineri w’Intara y’Iburasirazuba Rubingisa Pudence, Perezida w’Inama Njyanama y’Akarere Prof. Dr. Kabera Callixte, Ubuyobozi bw’Akarere, Umuyobozi mukuru w'Ikigega cyihariye cy'ingoboka[SFG] Madame Nibakure Florence,  n'abandi bayobozi mu zindi nzego zitandukanye, abafatanyabikorwa batandukanye.

Bifatanyije n'abaturage muri icyo gikorwa cyo gutangiza icukurwa ry'umuyoboro uzaba ureshya n'ibirometero 30 uzacukurwa ahakikije ikibaya kirimo umugezi w'Akagera mu bice by'imirenge ya Mahama na Mpanga, uyu mushinga bikaba biteganyijwe ko uzashyirwa mu bikorwa mu gihe cy'amezi atatu.

Umuyobozi w'Akarere Bwana Rangira Bruno, avuga ko ibi bikorwa byo gucukura umuringoti bakoze bigamije gukemura ku buryo burambye ikibazo cy’imvubu zoneraga abaturage, kuko kizabuza imvubu kwamuka ngo zijye kona. Asaba abaturage kuzakomeza kuhasibura, kugira ngo icyo washyiriweho kizagerweho, no kwitegura kubona amahirwe y'akazi muri uyu mishinga wo gucukura uyu muringoti.

Abaturage bishimiye uyu mushinga wo gukumira ko imvubu zakongera kubonera, nk'uko Nyiransengiyumva Annonciatta wo mu Kagari ka Saruhembe, yagize ati: “Uyu muyoboro ugiye gutangira imvubu zonera abaturage, akenshi ziza nijoro zikarya imyaka  ibishyimbo n'ibigori; ni ibintu byiza rero kuko ntabwo imvubu zizongera kutwonera.”

Umuyobozi mukuru w'Ikigo cyihariye cy'ingoboka, Madame Nibakure Florence yavuze ko iki kigega cyatanze amafaranga y'inkunga azahabwa abazagira uruhare mu gukomeza gucukura uyu muringoti kugira ngo imvubu ntizizongere gusohoka mu mazi ngo zangirize imyaka y'abaturage.

Yasabye abaturage ubufatanye mu kubungabunga no kurengera ibidukikije, ndetse asobanura n'uburyo mu gihe bibayeho ko hari abonerwa n'inyamaswa banyuramo kugira ngo bakemurirwe ibibazo bahabwe indishyi.