Igikorwa cyo gutangiza icyumweru cyahariwe kwimakaza ihame ry’uburinganire n’ubwuzuanye mu nsanganyamatsiko igira iti “Kwimakaza Ihame ry’uburinganire, imbarutso y’imiyoberere myiza n’iterambere rirambye.” ku rwego rw’Intara y’Iburasirazuba cyaberehe mu murenge wa Nyamugari mu karere ka Kirehe none ku wa 19 Nzeli 2022 gitangizwa n’Umunyamabanga muri Minisiteri y’Ubutegetsi bw’Igihugu INGABIRE Assoumpta. Muri iki gikorwa, umuyobozi w’Akarere ka Kirehe Bwana RANGIRA Bruno yasezeranyije imiryango ijana (100) yabanaga mu buryo butemewe n’amategeko yo mu murenge wa Nyamugari.

Mu kiganiro cyatanzwe n’Umunyamabanga wa Leta muri Minisiteri y’Ubutegetsi bw’Igihugu Madame INGABIRE Assoumpta, yagarutse ku bacyumva nabi ihame ry’uburinganire bakarifata nko kwigaranzura no gutsikamira abagabo asobanura ko ihame ry’uburinganire ari iryo guha umuntu wese uburenganzira n’amahirwe yaba umugabo cyangwa umugore mu kugaragaza icyo ashoboye no gutanga ibitekerezo bigamije iterambere.

Yagize ati “ Hari benshi batarasobanukirwa n’icyo ihame ry’uburinganire rivuze. Usanga hari abagore baryumva ukwabo n’abagabo bamwe bakaryumva ukwabo ariko mu magambo make ni uguha amahirwe angana buri wese yaba umuto cyangwa umukuru, umugore cyangwa umugabo niba hari ishuri bose bakaryitabira, niba ari ari ugupiganira akazi bose bagahabwa amahirwe yo gupiganwa mbese buri wese akagira uburenganzira bungana n’ubwa mugenzi we mu kugaragaza icyo ashoboye.”

Yaboneyeho gusaba bamwe mu bagore n’abagabo baryumva nabi kwisubiraho kuko kwimakaza ihame ry’uburinganire n’ubwuzuzanye bifasha umuryango mu iterambere kuko buri wese agira uruhare mu iterambere ry’urugo, bityo igihugu kigatera imbere kandi kigagira umutage wishimye. Ati “ Aho baryubahiriza neza umugabo agaha agaciro umugore, umugore agaha agaciro umugabo we bumvikana mu bwisanzure batera imbere bakita no ku bana babyaye bagakorera urugo rwabo,… ni cyo twifuza.

Bimwe mu bikorwa bizakorwa muri icyumweru cyahariwe kwimakaza ihame ry’uburinganire n’ubwuzuzanye harimo kwandika abana batanditse mu bitabo by’irangamimerere, gutanga ibiganiro mu nzego z’ibanze, ibiganiro n’abangavu babyaye imburagihe ndetse n’ababyeyi babo hagamijwe kubagarurira icyizere. Biteganyijwe ko mu ntara y’Iburasirazuba muri iki cyumweru cy’uburinganire n’ubwuzuzanye hazasezeranywa imiryangoirenga 2560.