Kuri uyu wa 14/04/2018,mu kwibuka imibiri isaga ibihumbi 58 ishyinguye mu rwibutso rwa Nyarubuye ku nshuro ya 24 Jenoside yakorewe Abatutsi muri Mata 1994 ibaye hashyinguwe imibiri umunani y’abazize Jenoside yakorewe Abatutsi.

Uyu muhango wo kwibuka ku nshuro ya 24 wabanjirijwe n’urugendo rwo kwibuka hakurikiraho gahunda yo gusura urwibutso rwa Nyarubuye hasurwa ibice bitandukanye bigize urwibutso rwa Nyarubuye basobanurirwa amateka yaranze Jenoside yakorewe abatutsi muri uyu murenge wa Nyarubuye.

Igice kimwe cy’uru rwibutso kigaragaza ibikoresho byakoreshejwe bitandukanye n’interahamwe mu kwica abatutsi ndetse n’imyambaro y’abishwe n’ibindi bitandukanye nk’imivure Interahamwe zakoreshaga mu gushyiramo amaraso y’abatutsi ngo barebe ko yahinduka amata,ishusho ya Bikiramariya interahamwe zatemye ngo zivuga ko afite isura nk’iyabatutsi.

Mu batanze ubuhamya yaba Benimana Florentine wari utuye mu cyahoze ari Komini Birenga ahitwa Nyaruvumu akaba yararokowe na Rwagihanga Theoneste avuga ko yahungiye kuri Paruwase ya Nyarubuye akaza kugenda ahunga agahishwa na Rwagihanga, abarokokeye I Nyarubuye bakabavuga ko uwari Burugumesitiri w’icyahoze ari Komini Rusumo yari ashyigikiye Interahamwe akorana nazo zica urwagashinyaguro I Nyarubuye.

Guverineri Mufulukye Fred wari umushyitsi mukuru yavuze ko imiyoborere myiza u Rwanda rufite iha uburenganzira busesuye buri munyarwanda wese,yasabye kandi abaturage gukomeza gusigasira ibyiza byagezweho n’umutekano cyane cyane urubyiruko,abasaba kandi gukomera kuri gahunda ya Ndumunyarwanda no kwirinda icyakongera kubatanya.

Ku rwibutso rwa Nyarubuye ruherereye mu murenge wa Nyarubuye Guverineri Mufulukye Fred afatanije n’abandi bayobozi batandukanye yavuze ko Kwibuka ari  mu rwego rwo guhumuriza abacitse ku icumu no kwifatanya nabo kwibuka ku nshuro ya 24 Jenoside yakorewe Abatutsi mu murenge wa Nyarubuye no mu Karere ka Kirehe muri rusange bashyinguye ku rwibutso rwa Nyarubuye.

Kwibuka bikaba byabaye n’umwanya wo gushyira indabo ku mva zishyinguyemo imibiri isaga ibihumbi 58,000 hakaba hanashyinguwe imibiri umunani mu rwego rwo guha icyubahiro Abatutsi abatutsi bapfuye muri Jenoside