Abakora umwuga w'ubworozi mu bice bitandukanye by'Akarere ka Kirehe biyemeje gukora ibishoka bakongera umukamo ukomoka ku bworozi bwabo. Ubuyobozi bw'Akarere ka Kirehe  buvuga ko aborozi bafite amahirwe menshi abazengurutse bityo bakwiye kuyabyaza umusaruro uko bikwiye.

Ni umwanzuro aborozi bafatiye mu nama yo ku wa 13 Mutarama 2023 yahuje Abanyamabanga Nshingwabikorwa b'imirenge, abakozi bashinzwe ubworozi mu mirenge no mu Karere, aba veterineri bigenga, aborozi banini, abayobozi ba Koperative z'ubworozi n'abayobozi ba MCC (Milk Collection Centers), inama ikaba yari igamije kwigira hamwe no gufata ingamba ku kongerera agaciro ibikomoka ku bworozi, kongera umukamo, gutera ubwatsi, kugaburira neza amatungo, kurwanya indwara, gukorera inzuri neza ndetse no gushaka icyororo cy'amatungo atanga umusaruro ushimishije.

Atangiza inama, umuyobozi w'Akarere bwana RANGIRA Bruno yabwiye abitabiriye ko hari amahirwe menshi mu Karere ashingiye ku bworozi yagakwiye kubyazwa umusaruro kandi kungurana ibitekerezo ku bworozi buteye imbere bizatuma habaho impinduka mu bworozi  butanga umusaruro.

Yagize ati "iyo urebye amahirwe ari mu Karere kacu ashingiye ku bworozi ni menshi kandi isoko ry'amata ni rigari ku buryo tutaragera ku bushobozi bwo kurihaza. Birakwiye ko rero buri wese atekereza ku cyo yakora ngo tugere ku bworozi butanga umusaruro ukwiriye kuruta kugira inka nyinshi ariko wareba umusaruro uzivamo ukawubura."

Umuyobozi w'ihuriro ry'aborozi mu Karere ka Kirehe bwana Musonera Vedaste kuri we ngo abona igihe kigeze cyo kwibanda ku gukora ubworozi bwa kinyamwuga butanga umusaruro ushimishije kandi ko inama iziye igihe kuko igiye gutuma bafata ingamba zo guhinduka no guhindura imyumvire nk'aborozi.

Ati" Nibyo koko ubusanzwe wasangaga tworoye ndetse dufite inka nyinshi ariko umusaruro ukaba muke cyane kuko tutorora kinyamwuga. Igihe ni iki cyo guhindura imyumvire tugahinduka Koko kandi tugakora ubworozi buteye imbere bujyanye n'igihe butanga umusaruro uhagije tukaniteza imbere bifatitse cyane ko ari wo murongo igihugu cyacu kitwerekezamo."

Uwituze Solange umuyobozi wungirije mu kigo cy'Igihugu gishinzwe guteza imbere ubuhinzi n'ubworozi_RAB  asobanurira aborozi uko bagera ku nka nziza zitanga umusaruro avuga ko icya mbere ari uguhindura imyumvire kuko inka yose yitaweho uko bikwiriy itanga umusaruro.

Yagize ati" Burya inka yose yitaweho uko bikwiriye yatanga umusaruro. Kwitabwaho bikwiriye mvuga ni ukuyiha amazi ahagije ndetse n'ubwatsi buhagije kandi ikarindwa indwara."

Akomeza agira ati" Hafi 87% y'ibigize amata ni amazi, ni ukuvuga ko byibuze kugira ngo inka itange umusaruro wa Litiro 20 igomba kuba yanyoye nibura Litiro 120 (amajerekani 6) z'amazi ku munsi kandi yanariye ubwatsi bwiza kandi buhagije."

Kongera umukamo ni kimwe mu by’ubukangurambaga bugamije kongera umusaruro ukomoka ku bworozi bwiswe “Tera imbere mworozi” bwibanzeho mu Ntara y’Iburasirazuba bwatangiye ku itariki 09- 14 Mutarama 2023.

Kugeza ubu mu Karere ka Kirehe habarurwa inka zisaga 42,218, ihene zisaga 88,730, n’intama zisaga 5,112 ndetse n’inzuri 362. Kuri ubu mu Ntara y’Iburasirazuba habarizwa inka ibihumbi 514 na koperative z’ubworozi 41, umukamo uboneka ku munsi kuri ubu ni litiro ibihumbi 133 mu gihe cy’imvura mu gihe mu mpeshyi ugabanuka ukagera kuri litiro 44 ku munsi, aha akaba ari ho ubuyobozi buhera busaba abakora umwuga w’ubworozi gufata ingamba no kwibanda ku kongera umukamo.