Kuri uyu wa mbere tariki ya 16/10/2017 mu Karere ka Kirehe mu cyumba cy’inama cy’Akarere ka Kirehe hateraniye inama y’aborozi iyobowe n’umuyobozi w’Akarere ka Kirehe mu rwego rwo kugaragaza imikoreshereze y’ubutaka itemewe ijyanye no kugabanya ibice hagamijwe “guhinga tugabane” cyangwa kugurisha

Mu nama barebeye hamwe uko igikorwa cyo gupima ubutaka bw’inzuri bwahinzwe ku kigero kirenga icyemewe bibutswa ko ikigero cyemewe ari ikitarengeje 2ha),banagaragarizwamo inzuri zitajya zihingwamo ubwatsi.

Inama yibukije ko abagiye bahinga tugabane, abaciyemo inzuri ibice n’abazigurishije ibice ko amabwiriza ya Minisitiri w’Umutungo Kamere agenga imikoreshereze y’ubutaka  bwasaranganijwe yo kuwa 03/10/2012 mu ngingo yayo ya 2 avuga ko Umuntu wese wasaranganijwe ubutaka agomba kubukoresha nk’uko biteganywa n’amabwiriza ya Minisitiri w’Ubuhinzi n’Ubworozi. Uwasaranganijwe ubutaka bw’ubworozi abujijwe kubugabiza abahinzi agamije kugabana umusaruro nabo.

Mu nama bibukije ko mu ngingo ya 3, Uwasaranganije ubutaka wese abujijwe kugabanyamo ubutaka uduce no kugurisha mu duce. Uwifuza kugurisha ubutaka yasaranganijwe agurisha isambu cyangwa urwuri rwose kandi uyiguze nawe akayikoresha nk’uko ingiyo ya 2 y’aya mabwiriza abivuga.

Amabwiriza ya Minisitiri w’Ubuhinzi n’ubworozi yo kuwa 17/10/2012 agenga imikoreshereze y’inzuri mu ngingo ya 1.3. avuga ko umworozi udafite ubundi butaka yemerewe guhinga Hectari zitarenze ebyiri (2ha) mu rwego rwo kugira ibitunga umuryango we.

Buri muntu  afite uburenganzira busesuye bwo gukoresha ubutaka bwe hakurikijwe ibiteganywa n’iri tegeko n’andi mategeko.

Mu nama Umuyobozi w’Akarere ka Kirehe Muzungu Gerald yibukije ko Leta yishingira uburenganzira bwo gutunga ubutaka  mu mudendezo kandi ikanarinda nyirabwo kubwamburwa ku maherere, bwaba bwose cyangwa igice cyabwo, keretse gusa mu gihe cyo kwimura abantu ku mpamvu z’inyungu rusange.

Mu gihe hari ibimenyetso bigaragaza ko ubutaka bwagenewe ubuhinzi, ubworozi cyangwa amashyamba, bumaze imyaka itatu (3) ikurikirana butabyazwa umusaruro kandi nta mpamvu yumvikana yatanzwe, Minisitiri ufite ubutaka mu nshingano ze,  afite ububasha bwo gufatira ubwo butaka no kubumwambura

Mu nama bibukijwe ko icyemezo cyo kwambura ubutaka nyirabwo ntigishobora gufatwa nyirabwo atarahabwa integuza yanditse y’iminsi mirongo cyenda (90) ibarwa uhereye umunsi yayakiriyeho.

Inama ysojwe bibutsa ko mu gihe nyir’ubutaka atabonetse, integuza ihabwa ukoresha ubutaka, kopi yayo ikamanikwa ku biro by’Akarere, iby’Umurenge, n’iby’Akagari ubutaka buherereyemo mu gihe cy’iminsi mirongo icyenda (90) ibarwa uhereye ku munsi wa nyuma imanikiweho. Iyo nteguza imanikwa n’ahandi hantu hahurira abantu benshi mu Kagari ubutaka buherereyemo kandi igatangazwa mu bitangazamakuru byemewe na Leta.