Ubuyobozi bw’Akarere bugaragaza ko ibikorwa byo kubaka umudugudu ku mupaka wa Rusumo uzatuzwamo abagizweho ingaruka n’iy’ubakwa ry’urugomero rw’amashanyarazi rwa Rusumo bigeze ku kigero cya 95%. Uyu mudugudu w’icyitegererezo (Model Village) uri kubakwa ku ruhande rwo mu Murenge wa Kigarama, Akagari ka Nyankurazo muri Site ya Nshungerezi.

Ni umudugudu wubatswe ku nkunga ya Banki y'Isi, binyuze mu mushinga NELSAP. Biteganyijwe ko uzatuzwamo imiryango 80 izakurwa mu manegeka, kubera ko hari imwe mu miryango ihatuye ahantu hahanamye, hakaba n'abagiye mu manegeka yatewe n'iyubakwa ry'urugomero rw’amashanyarazi rwa Rusumo.

Ni umudugudu ufite ibintu byose by’ibanze umuturage yakenera birimo amazi, amashanyarazi, shuri, ivuriro, urwego rw’ubuyobozi, inyinshi muri izi nzu zubatse ku buryo imwe izajya ituramo imiryango ibiri [2 in 1].”

Umuyobozi w’Akarere Bwana Rangira Bruno, yagize ati: “Nk’uko mubibona uyu mudugudu ni umudugudu umeze neza ufite byose, hari kubakwa ECD, ndetse n’ikigo cy’amashuri, hari igikumba aho aborozi bazajya bororera inka zabo. Ni umudugudu uzahindura imibereho y’abaturage mu rwego rw’imiturire myiza.”

Ku mupaka wa Rusumo huzuye urugomero rw’amashanyarazi rwubatswe mu mushinga washowemo miliyoni 468 z’Amadorari, uhuriweho n’ibihugu bya Tanzania, u Burundi n’u Rwanda rutanga megawati 80 zisaranganywa n’ibyo bihugu.