Kuri Stade y’Akarere ka Huye, mu Ntara y'Amajyepfo habereye imikino ya ¼ mu marushanwa y’Umurenge Kagame Cup 2024/2025 ku rwego rw’Igihugu ikipe y’Umurenge wa Kirehe yo mu Karere ka Kirehe y’abagabo ihagarariye Intara y’Iburasirazuba  yatsinze iy’Umurenge wa Mbazi 1-0 y’Akarere ka Huye ihagarariye Intara y’Amajyepfo kuri uyu wa Gatanu tariki 09 Gicurasi 2025.

Muri iyi mikino y’umupira w’amaguru ikipe y’Umurenge wa Kirehe mu bagabo ihagarariye Intara y’Iburasirazuba yatsinze  Umurenge wa Mbazi wo mu Karere ka Huye uhagarariye Intara y’amajyepfo igitego 1-0, mu mukino ubanza, hakazaho n'umukino wo kwishyura, uteganyijwe tariki 16 Gicurasi 2025 aho uzabera kuri Sitade y'Akarere ka Ngoma, mu Ntara y'Iburasirazuba.

Umuyobozi w’Akarere wungirije ushinzwe imibereho myiza Madame Mukandayisenga Janviere  yashimiye abitabiriye aya marushanwa by’umwihariko abakinnyi kuba baritwaye neza bagatsinda Ikipe y'Umurenge wa Mbazi wo mu Karere ka Huye uhagarariye Intara y’amajyepfo, abasimira kuba bakomeje guhagararira neza Akarere n’Intara y’Iburasirazuba abasaba gukomeza kwitwara neza tukazatahana igikombe cyo ku rwego rw'Igihugu.

Umurenge Kagame Cup, ni amarushanwa ngarukamwaka yatangiye muri 2006, icyo gihe yitwa “Amarushanwa y’Imiyoborere Myiza”,yashyizweho mu rwego rwo kwimakaza amahame y’imiyoborere myiza.

Muri 2010, nibwo aya marushanwa yatangiye kwitwa  “Umurenge Kagame Cup” mu rwego rwo kuzirikana no guteza imbere amahame y’Imiyoborere myiza u Rwanda rufite irangajwe Imbere na Nyakubahwa Perezida wa Repubulika Paul Kagame.