Kuri iki Cyumweru, tariki 15 Kamena mu Karere ka Musanze hasojwe amarushanwa y'Umurenge Kagame Cup 2024-2025, hahembwa abakinnyi ndetse n’amakipe yitwaye neza, akegukana ibikombe, aho Ikipe y'abagabo mu mukino wa Sitball yo mu Karere kacu yari ihagarariye Intara y'Iburasirazuba ariyo yegukanye igikombe ku rwego rw'Igihugu itsinze ikipe ya Musanze ku amanota 45-43.

Naho mu bagore, Ikipe y'Akarere kacu mu mukino wa Sitball nayo yageze ku mukino wa nyuma yegukana umwanya wa kabiri ku rwego rw'Igihugu, nyuma yo gutsindwa n'ikipe y'Akarere ka Bugesera kuri Finali.

Mu mukino wo gusiganwa ku magare ya  Gakondo, Mukabikorimana Leatitia wakinnye ahagarariye Akarere kacu yegukanye umwanya wa Gatatu ku rwego rw'igihugu.

Byari ibyishimo ku bakinnyi n’abafana b’Ikipe y'abagabo ya Sitball ya Kirehe nyuma yo kwegukana igikombe cy’iri rushanwa, bahabwa igikombe ku rwego rw'igihugu

Ubuyobozi bw'Intara bwashimiye amakipe yaserukiye Intara yegukanye ibikombe ku rwego rw'Igihugu mu marushanwa y'Umurenge Kagame CUP 2024-2025. 

Mu gusoza aya marushanwa Minisitiri w'Ubutegetsi bw'Igihugu Dr Mugenzi Patrice  yashimiye abitabiriye bose, by’umwihariko abahembwe. Ati “Turasabwa kubyaza umusaruro impano zagaragaye muri aya marushanwa, zikarerwa kandi zigatezwa imbere. Dufite ingero zitwereka ko  uru ari  urubuga rwo kuzamura impano ndetse no kwiteza imbere.”