Tariki ya 01/05/2025 Akarere ka Kirehe kifatanyije n'abandi banyarwanda n’Isi yose mu kwizihiza umunsi mpuzamahanga w’umurimo, ku nsanganyamatsiko igira iti:"Guhanga umurimo: intego dusangiye". Umuyobozi w’Akarere Bwana Rangira Bruno yashimiye Umukozi w’indashyikirwa witwa Ndayizeye Chrispin, Umukozi ku rwego rw’Akarere ushinzwe iterambere ry’ubuzima no gukumira indwara, watowe na bagenzi be nk’indashyikirwa muri uyu mwaka wa 2025; amusaba gukomeza gukora neza.

Kwizihiza uyu munsi, byabimburiwe no gusura zimwe muri site z’ubukerarugendo mu Murenge wa Nasho, aho Umuyobozi w’Akarere Bwana Rangira Bruno ari kumwe n’abandi bayobozi n'abakozi b'Akarere n’inzego z’umutekano basuye aharimo isumo rya Kazirankara, no kuzamuka umusozi wa Nyamurindira.

Ibirori byo kwizihiza uyu munsi mpuzamahanga w’umurimo byakomereje mu busitani bw’Akarere aho abakozi bose bari kumwe n’abayobozi bagejejweho ikiganiro cy’uyu munsi w’umurimo cyatanzwe n’Umuyobozi w’Akarere wungirije ushinzwe imibereho myiza Madame Mukandayisenga Janviere Kijyanye n’imyitwarire mbonezamurimo ku bakozi ba Leta no gukora kinyamwuga yibutsa abakozi ko bagomba kurangwa n’imyitwarire mbonezamurimo mu bikorwa bakora, ko amahame n’indangagaciro bigenga imyitwarire myiza y’Umukozi, nk’umuntu ufitiwe icyizere cy’abamukoresha ndetse nicy’abamugana ababwira ko abakozi bafite imyitwarire mbonezamurimo barangwa no gukora kinyamwuga. 

Mu butumwa yagejeje ku bayobozi n'abakozi b'Akarere Umuyobozi w’Akarere Bwana Rangira yashimiye abayobozi n’abakozi bose muri rusange ku kazi bakora, avuga ko buri wese akwiye guharanira gukora neza, gutanga umusaruro w’urwego akorera no ko kuri we bwite, akuzuza neza inshingano. Yasabye abakozi bose gukomeza kwitanga, kwihanganira gukora amasaha y’ikirenga; no kwita ku guha umwanya abaturage bakabatega amatwi bakanabakemurira ibibazo.

Guverinoma y’u Rwanda ibinyujije mu Cyerekezo 2050 yihaye intego yo kugera ku bukungu buteye imbere ku rwego ruringaniye mu 2035, no kuba Igihugu gifite ubukungu buteye imbere cyane muri 2050 aho abanyarwanda bose bazaba barateye imbere mu bukungu, no mu mibereho myiza.

Gahunda ya Guverinoma y’imyaka itanu igamije kwihutisha iterambere (NST2) iteganya kongerera ubushobozi Inzego zaba iza Leta cyangwa iz’abikorera kugira ngo zihutishe ihangwa ry’imirimo ndetse zirusheho gutanga serivisi nziza kandi inoze