Kuri uyu wa Kane tariki ya 23 Ukwakira 2025, mu Karere hateranye inama nyunguranabitekerezo y'ihuriro ry'Ubumwe n'Ubudaheranwa ku nsanganyamatsiko igira iti: “Twimakaze ubumwe n'ubudaheranwa.”

Muri iyi nama, Umushyitsi Mukuru yari Hon. Nyirarukundo Ignacienne wari kumwe na Hon. Pierre Damien Habumuremyi bakaba bakiriwe n'Umuyobozi w'Akarere Bwana Rangira Bruno ari kumwe na Perezida w'Inama Njyanama y'Akarere Prof. Dr. Kabera Callixte.

Muri iyi nama haganiriwe ku ngingo zirimo kurebera hamwe ishyirwa mu bikorwa ry'imyanzuro y'inama y'ihuriro riheruha ryateranye kuwa 18 Ukwakira 2025, ibiganiro ku mikorere y'ihuriro ry'ubumwe n'ubudaheranwa mu Karere, ikiganiro ku bumwe, ubudaheranwa na Ndi Umunyarwanda byatanzwe na Hon. Pierre Damien Habumuremyi, ndetse habaho n'umwanya wo kungurana ibitekerezo no gufata ingamba ku nzitizi zikigaragara zirimo ihererekanya ry'umurage mubi no gutakaza indangagaciro mu rubyiruko, n'ibindi.

Umuyobozi w'Akarere Bwana Rangira Bruno yavuze ko hakozwe ibikorwa bitandukanye mu rwego rwo kwimakaza Ubumwe n'Ubudaheranwa harimo gutanga ibiganiro bya Ndi Umunyarwanda mu byiciro bitandukanye n'ibyisanamitima, mu rwego rwo kwimakaza ubumwe n'ubudaheranwa.

Dr. Pierre Damien Habumuremyi uri mu nama y'inararibonye mu rubuga Ngishwanama rw'inararibonye z'u Rwanda, yagaragarije inshingano z'abagize iri huriro harimo no kwimakaza ubumwe n'ubudaheranwa mu banyarwanda ashimira Perezida wa Repubulika wasubije agaciro abanyarwanda bose.

Mu butumwa bw'umushyitsi mukuru muri iyi nama, Hon. Ignacienne Nyirarukundo yasabye abitabiriye Ihuriro ry'Ubumwe n'Ubudaheranwa mu Karere ka Kirehe kwigisha urubyiruko amateka y'igihugu, gukoresha neza imbuga nkoranyambaga, gukumira no kurandura ingengabitekerezo ya Jenoside ashimira ubuyobozi abasaba kwimakaza indangagaciro z'abanyarwanda.

Yabasabye gukomeza gushimangira amahitamo y'Abanyarwanda yo kuba Umwe, kwirinda amacakubiri n'ivangura iryo ariryo ryose mu muryango, kwirinda amakimbirane mu miryango no gukomeza gushimangira ubumwe n'ubudaheranwa bw'Abanyarwanda.

Mu bitabiriye iyi nama y'ihuriro ry'ubumwe n'ubudaheranwa harimo Abajyanama bagize Inama Njyanama y'Akarere, Abahoze ari Abayobozi mu nzego z'imitegekere y'Igihugu, Abahagarariye Ibuka na Avega, Ba Perezida  b'Inama Njyanama z'imirenge, Abanyambanga Nshingwabikorwa b'imirenge, Uhagarariye imiryango ishingiye ku myemerere, Abafatanyabikorwa b'Akarere mu bumwe n'ubudaheranwa, Abakangurambaga b'ubumwe n'ubudaheranwa,  Abahuzabikorwa b'Inama y'Igihugu y'urubyiruko ku rwego rw'Akagari, umurenge n'Akarere ndetse n'Abarinzi b'Igihango.

Nyuma y'ibiganiro no kungurana ibitekerezo hafashwe imyanzuro irimo gukomeza gushimangira no gushyira mu bikorwa amahame avugwa mu itegeko nshinga, intego za Repubulika y'u Rwanda n'amahitamo y'Abanyarwanda.