Ubuyobozi bw'Akarere, guhera kuri uyu wa Kabiri tariki 12 Kanama 2025 bwatangije gahunda ya ‘Shyashyanira umuturage’ igamije kwegera abaturage no kubakemurira ikibazo, abayobozi babasanze aho bari.

Umuyobozi w'Akarere Bwana Rangira Bruno, Umuyobozi w'Akarere wungirije ushinzwe imibereho myiza y'abaturage Madame Mukandayisenga Janviere, bari kumwe n'inzego z'umutekano batangirije iyi gahunda  yihariye yo kwegera abaturage mu Murenge wa Mushikiri aho abaturage bagaragaje ko bashimye iyi gahunda begerejwe n’ubuyobozi yo kubakemurira ibibazo ya “Shyashyanira Umuturage”.

Muri iyi gahunda, Ubuyobozi buzajya bwegera abaturage mu mirenge yose n’utugari batuyemo, bakakira ibyifuzo ndetse bakanakemura ibibazo byabo babasanze aho bari. Ikaba yatangiye kuri uyu wa 12 Kanama, itangirira mu Murenge wa Mushikiri, bikaba biteganyijwe ko izasozwa tariki 23 Nzeri 2025, ikazajya ibera mu mirenge n’utugari kuri site zagenwe.

Muri iyi gahunda, ubuyobozi bw’Akarere n’izindi nzego bazajya basura baganire n’abayobozi n’abakozi mu byiciro bitandukanye mu mirenge, banabonereho umwanya wo gusura bimwe mu bikorwa biri mu mirenge, by’umwihariko baganira n’abaturage babakemurire ibibazo.

Mu Murenge wa Mushikiri aho iyi gahunda yatangirijwe mu kagari ka Cyamigurwa, hakiriwe ibibazo birenga 20 by’abaturage, byiganjemo, ibyangombwa byo gutema amashyamba abaturage bavuga ko bakunze kubura, amakimbirane n’ibindi. Abaturage babwiye itangazamakuru ko bavuga ko iyi gahunda yabashimishije kuko ibibazo byabo byahawe umurongo kandi bidasabye ko basiragira.

Ntakirutimana Eugene utuye mu Murenge wa Mushikiri yagize ati: “Turishimye cyane kuba ubuyobozi bwatwegereye, urabona ko hari ibibazo byari bitwugarije bahaye umurongo, batugiriye inama nziza kandi zubaka, kimwe mu bigaragaza ko ubuyobozi bwacu butwitaho.”

Uwihirwe Marie Claire na we utuye mu Murenge wa Mushikiri, yagize ati: “Biba byatunejeje cyane kuko natwe tubona ko Leta itwitayeho, urabona baje bareba uko umuturage abayeho, turabaganiriza natwe tukisanzura. Icyo nabwira ubuyobozi bwacu, ni uko iyi gahunda yakomeza kuko tubabwira imbogamizi tugira bakaba bazidufashamo no kuzikemura.”

Umuyobozi w’Akarere ka Kirehe, Rangira Bruno avuga ko iyi gahunda ya ‘Shyashyanira Umuturage’ ari gahunda itandukanye n’ibikorwa bisanzwe bikorwa byo gukemura ibibazo by’abaturage bibera mu nteko z’abaturage.

Yemeza ko iyi yo yihariye, yagize ati: “Ni gahunda twashyizeho iba buri mwaka, aho inzego z’Akarere zimanuka zikaza gukorana n’abaturage ku rwego rw’akagari, bitandukanye n’ibikorwa byari bisanzwe bikorwa birimo inteko z’abaturage kuko naho hakemurirwa ibibazo byabo. Ubu tuzajya tujya muri buri murenge, dufate iminsi ibiri amanywa n’ijoro tureba umutekano tunakemura n’ibibazo by’abaturage.”