Kuri uyu wa 04 Ukwakira hatangizwa ukwezi kwahariwe kuzirikana Ubumwe n’Ubudaheranwa by’Abanyarwanda mu nsanganyamatsiko igira iti “Uruhare rwa buri Munyarwanda wese mu kubumbatira Ubumwe no kubaka Ubudaheranwa bw’Abanyarwanda” Umuyobozi w'Akarere ka Kirehe Bwana Rangira Bruno mu butumwa bwe yibukije abaturage ko Ubumwe bw’Abanyarwanda ari inkingi mwikorezi izindi ngamba zose zubakiyeho, bityo bakaba basabwa kwimakaza isano Abanyarwanda bafitanye.

Yagize ati “Ubumwe bw’Abanyarwanda niyo nkingi ya mwamba izindi ngamba zose zubakiyeho. Turasabwa gusigasira no kwimakaza isano Abanyarwanda dufitanye tugashimangira inkingi zitajegajega zubatse Ubumwe bw’Abanyarwanda, arizo: Igihugu, Ubunyarwanda,Umuco w’Abanyarwanda,Ururimi,Imibanire mu Banyarwanda, Kirazira na Kiraziririzwa, dusigasira umuco mwiza uduhuje”.

Ni ibikorwa byabereye mu Mirenge yose igize Akarere ka Kirehe aho abageze mu za bukuru bagaragaje ibyishimo byinshi bishimira ibyagezweho ndetse n’ubuyobozi bwiza bushyira imbere umuturage.

Mu kwizihiza umunsi mukuru w’abageze mu za bukuru ufite insanganyamatsiko igira iti “Abageze mu zabukuru, isôoko tuvomaho” bamwe mu bageze mu zabukuru bashyikirijwe impano bagenewe zirimo n’uburiri bwo kubavura amavunane ngo iminsi ikomeze kwicuma.

Umuyobozi w’Akarere wungirije ushinzwe Imibereho myiza Madame Mukandayisenga Janviere, yasabye  abakiri bato kubaha no kuba hafi abasheshe akanguhe babakemurira ibibazo bafite  anaboneraho no kugenera abari Aho ubutumwa bujyanye n'ukwezi k'Ubumwe n'Ubudaheranwa bibutswa ko Ubumwe, urukundo, Gukunda igihugu n'umurimo Ari indangagaciro zikwiye kuranga abanyarwanda birinda ibyabatanya ahubwo bakimakaza ubumwe n'urukundo.

Nyuma y’ibiganiro bitandukanye no kwidagadura, Muri gahunda yo gukemura ibibazo bibangamiye imibereho myiza y’abaturage yiswe “Shyashyanira umuturage” Ubuyobozi bw’Akarere ka Kirehe bwaboneyeho kwakira no gukemura ibibazo by’abaturage.