Nubwo Jenoside yakorewe Abatutsi mu 1994,yakoranywe ubugome bw’indengakamere igasigira abayirokotse ibikomere byinshi yaba ku mubiri ndetse no ku mutima, gushimira abafashije kurokora abacitse ku icumu bavuga ko bibafasha mu buzima bwabo.

Ni urugendo rutoroshye rusaba ubutwari, kuko yaba gutera intambwe ukibuka uwagufashije mu gihe cya  Jenoside yakorewe Abatutsi akakurokora bisaba ubutwari bukomeye butagirwa na buri wese.

Mu murenge wa Musaza ku wa 29/04/2025 hateranye inteko y’abaturage, Umuyobozi w’Akarere wungirije ushinzwe imibereho myiza Madame Mukandayisenga Janviere ari kumwe n’inzego z’umutekano na Perezida wa IBUKA mu Karere Bwana Nduwimana Bonaventure bifatanyije n’abaturage bo muri uyu murenge, hakaba harabayeho igikorwa cyo gushimira imiryango 3 yahishe bamwe mu  bahigwaga mu gihe cya Jenoside yakorewe Abatutsi mu 1994 bakaba bararokotse Jenoside; bashimira ababahishe bakarokoka Jenoside yakorewe Abatutsi muri mata 1994.

Aba barokotse Jenoside yakorewe Abatutsi bahaye igihembo cy'inka ababafashije kurokoka Jenoside yakorewe Abatutsi muri Mata 1994, ni inka zahawe amazina ya Isano, Ineza na Intigunga.

Umurisa Joselyne warokotse Jenoside, yavuze ko basaba gukomeza kubakana Igihugu asaba ko abantu bajya bavuga uko byagenze bakamenya amateka, asaba ko abantu bajya batanga amakuru nyayo mu rwego rwo kubaka Igihugu kizira amacakubiri, ashimira cyane abamufashije kumuhisha kurokoka Jenoside yakorewe Abatutsi; avuga ko iyo umuntu yakugiriye neza gushima ari byiza.