Kuri uyu wa Kabiri, Umuyobozi w’Akarere wungirije ushinzwe iterambere ry’ubukungu Bwana Nzirabatinya Modeste yitabiriye igikorwa cyateguwe na Koperative COOPRIKI-Cyunuzi ihuriweho n’abahinzi b’umuceri bo mu turere twa Kirehe na Ngoma, mu gikorwa cyo kwishyurira Mituweli 2025-2026 abanyamuryango bayo bose basaga ibihumbi bitatu n'abagize imiryango yabo.

Ni igikorwa cyabereye ku kiciaro cy'iri koperative ihinga umuceri giherereye mu Murenge wa Gatore. Iki gikorwa cyanitabiriwe n'Umuyobozi w'Akarere ka Ngoma wungirije ushinzwe imibereho myiza y'Abaturage Madame Mukayiranga Marie Gloriose.

Muri iki gikorwa COOPRIKI-Cyunuzi yishyuriye ku ruhande rw’Akarere ka Kirehe abanyamuryango bayo amafaranga 18,177,000Frw, mu gihe ku ruhande rw’Akarere ka Ngoma yishyuzwe 16,824,000Frw y’imisanzu ya Mituweli y'umwaka utaha wa 2025-2026. Iyi Koperative y’abahinzi b’umuceri ihinga umuceri kuri hegitari 490, aho ubu bageze ku rwego rwo kweza kuri hegitari imwe, ikigereranyo cya toni eshanu.

Umuyobozi w’Akarere wungirije ushinzwe iterambere ry’ubukungu Bwana Nzirabatinya Modeste yashimiye Koperative y’abahinzi b’umuceri ya COOPRIKI-Cyunuzi kuri iki gikorwa, ati: “Duhora twifuza ko Koperative zikora neza. Mudufasha gushyira mu bikorwa gahunda za Leta mu buryo bwinshi, nk’ubu mudufashije gutangira Mituweli abaturage benshi, mudufasha gukemura ikibazo cy’imirire, imyigire y’abana ku ishuri n’ibindi bijyanye n’ubukungu.”

Yabasabye gukomeza gukora neza, guteza imbere abanyamuryango mu buryo bwose, no kongera umusaruro, abizeza ko na zimwe mu mbogamizi bagifite zizagenda zikemurwa ku bufatanye n'Ubuyobozi mu nzego zitandukanye.