Ku itariki ya 30 Werurwe 2025, kuri Sitade y’Akarere ka Ngoma habereye imikino ya nyuma mu marushanwa y’Umurenge Kagame Cup 2025 ku rwego rw’Intara y’Iburasirazuba.

Mu mupira w’amaguru, Ikipe y’Umurenge wa Gahara niyo yatwaye igikombe mu bagore itsinze Umurenge wa Fumbwe wo mu Karere ka Rwamagana ibitego 2-0 naho mu bagabo umurenge wa Kirehe watsinze umurenge wa Murambi wo mu Karere ka Gatsibo nyuma yo kunganya 1-1 bakajya muri Penalite birangira Kirehe itsinze kuri penalite 4 kuri 3.

Mu mikino y’amaboko Akarere ka Kirehe katwaye igikombe  bya Sitball mu bagore n’abagabo bityo Akarere gahagararira Intara y’Iburasirazuba 

Mu birori bisoza amarushanwa y’Umurenge Kagame Cup 2025 ku rwego rw’Intara y’Iburasirazuba; bitabiriwe na Guverineri w'Intara y'Iburasirazuba Rubingisa Pudence ari kumwe n’Abayobozi b’Uturere, inzego z’umutekano ndetse n'abaturage baturutse mu Turere dutandukanye tugize iyi Ntara harimo aba Kirehe baje gushyigikira amakipe yabo.

Guverineri w’Intara y’Iburasirazuba Rubingisa Pudence yashimiye abagize uruhare mu gutegura aya marushanwa, amakipe yitabiriye by'umwihariko ayageze ku mukino wa nyuma asaba  ayabonye itike yo kuhagararira Intara ku rwego rw'Igihugu kuzitwara neza akazatahana ibikombe.

"Muri aya Marushanwa y'Umurenge Kagame Cup, abaturage baritabiriye ku bwinshi kandi ku mikino itandukanye kuko twahisemo imiyoborere idaheza. Turashimira amakipe yose yitabiriye ndetse n'ayegukanye ibikombe, turabasaba kurushaho kwitegura kugira ngo muzaheshe ishema Intara yacu kandi turabashyigikiye"

Guverineri yakomeje asaba abaturage gukomeza umuco wo kwitabira siporo, kuko gukora siporo bifasha mu kugira ubuzima bwiza abibutsa kandi ko Igihugu kigiye kwinjira mu minsi 100 yo Kwibuka ku nshuro 31 Jenoside yakorewe Abatutsi mu 1994, abakangurira kuzitabira gahunda n'ibikorwa bitandukanye byateganyijwe muri iki gihe cyo Kwibuka." 

Umurenge Kagame Cup ni amarushanwa ngarukamwaka yatangiye muri 2006, icyo gihe yitwa “Amarushanwa y’Imiyoborere Myiza”,yashyizweho mu rwego rwo kwimakaza amahame y’imiyoborere myiza.

Muri 2010, nibwo aya marushanwa yatangiye kwitwa  “Umurenge Kagame Cup” mu rwego rwo kuzirikana no guteza imbere amahame y’Imiyoborere myiza.