Kuri uyu wa Kane, Umuyobozi w’Akarere Bwana Rangira Bruno, ari kumwe n’abagize komite nyobozi, abagize inama y’umutekano itaguye n’abashyitsi batandukanye, yayoboye inama idasanzwe y’abakozi bose b’Akarere kuva ku rwego rw'Akagari,  ifite insanganyamatsiko igira iti: “Uruhare rwanjye mu ishyirwa mu bikorwa rya gahunda y’Igihugu yo kwihutisha iterambere ya NST2”

Afungura iyi nama , Umuyobozi w’Akarere Bwana Rangira yavuze ko iyi nama izafasha mu ishyirwa mu bikorwa rya gahunda z’iterambere ry’akarere n’Igihugu muri rusange. Ati: “Ni ngombwa ko twese nk’abayobozi n’abakozi mu nzego z’ibanze tubyumva kimwe, tukumva  inshingano zacu mu buryo bwimbitse. Buri muntu wese agomba kumenya  inshingano  ze, no kumenya uko azuzuza.”

Abitabiriye iyi nama bagejejweho ibiganiro birimo ikijyanye n’ imbanzirizamushinga y’imihigo y’umwaka wa 2025-2026 n’ingamba zizafasha kuyeza,  Gahunda ya  2 y’Igihugu yo kwihutisha iterambere(NST2), Kunoza  imikorere n’imitangire ya serivisi n’ Imyitwarire mbonezamurimo ku bakozi ba Leta; kubungabunga umutekano, habaho n’umwanya wo kungurana ibitekerezo no gutira hamwe ingamba.

Umugwaneza Claudine wari intumwa  ya Komisiyo y’Igihugu  ishinzwe abakozi ba Leta;  yibukije ko abakozi ba Leta bakwiye gushyira  imbere gutanga serivisi nziza ku baturage kandi bubahiriza amategeko n’amabwiriza, bakagira imyitwire mbonezamurimo kandi bagakora kinyamwuga, bagashyira umuturage ku isonga kugira ngo habeho kwihutisha iterambere.

Mu gusoza iyi nama Umuyobozi w’Akarere Rangira yashimiye abayitabiriye, abasaba kwita ku butumwa bwose bwatanze kandi bakita ku gushyira mu bikorwa gahunda y’Igihugu yo kwihutisha  iterambere NST2, baharanira  gukora neza kurushaho, yizeza ubufatanye kugira ngo imitangire ya serivisi mu nzego zose igerwaho; iterambere ry'abaturage rirusheho kwiyongera. Yavuze ko hazasuzumwa uburyo iyi nama yihariye yajya nibura buri mezi atandatu.