Umuyobozi w'Akarere wungirije ushinzwe imibereho myiza y'abaturage Madame Mukandayisenga Janviere, kuri uyu wa Kabiri tariki 26 Kanama 2025 yakiriye itsinda rigizwe n'abashyitsi baturutse muri Banki y'Isi, Minisiteri ishinzwe ibikorwa by'ubutabazi-MINEMA, Umukozi muri Ambasade ya Denmark, BRD, Ishami ry'Umuryango w'abibumbye ryita ku mpunzi mu Rwanda- UNHCR n'abagize komite y'urugaga rw'abikorera -PSF ku rwego rw'Akarere, baganira ku bikorwa by'imishinga iri mu karere ikorwa binyuze mu mushinga witwa Jya Mbere, uterwa inkunga na Banki y'Isi.

Umuyobozi w'Akarere wungirije ushinzwe imibereho myiza y'abaturage Madame Mukandayisenga Janviere yashimiye abafatanyabikorwa bose ku bufatanye bwiza no ku nkunga bakomeje gutera akarere binyuze ahanini mu bikorwaremezo byubakwa hagamijwe guteza imbere abaturage b'akarere barimo n'impunzi zicumbikiwe mu nkambi ya Mahama.

Nyuma yo kuganira ku bikorwa by'umushinga Jya Mbere uterwa inkunga na banki y'Isi binyuze muri MINEMA, abagize Ubuyobozi bw'Akarere n'abo bashyitsi, basuye inzu yubatswe mu bitaro (OT building) nyuma yaho basura Musaza TVET na Bukora TVET bikaba ari ibikorwa byubatswe binyuze muri uyu mushinga Jya Mbere; nyuma yaho basuye agakiriro ka Nyakarambi gakorerwamo na STECOMA. 

Mu Karere ibikorwa by'ingenzi byagezweho ku nkunga ya Banki y'Isi harimo ivugururwa ry'ibitaro by'Akarere ka Kirehe, BUKORA na MUSAZA TVET, ikigo gishya cya siyansi muri Paysannant L ku nkambi ya Mahama, Umushinga watangiye ubu wo kuvugurura no kongerera ubushobozi ikigo nderabuzima cya Nyarubuye.

Ibi bimaze kugerwaho bishimangira ko Akarere kiyemeje guteza imbere ubuvuzi, uburezi, n’iterambere ry’abaturage.