Kuri uyu wa Kabiri, itsinda n’Abasenateri rigizwe Hon. Murangwa Ndangiza Hadija (uyoboye itsinda), Hon.Gahamanyi Bibiane Mbaye na Hon. Uwizeyimana Evode, bo muri Komisiyo y’Ububanyi n’Amahanga, Ubutwererane n’Umutekano, basuye akarere kacu, baje mu gikorwa cyo kugenzura ibikorwa mu kurwanya ingengabitekerezo ya Jenoside no guteza imbere n’ubudaheranwa bw’Abanyarwanda.

Bakiriwe n’Umuyobozi w’Akarere Bwana Rangira Bruno, ari kumwe n’Umunyamabanga Nshingwabikorwa w’Akarere Madame Kamana Diane.

Iyi nama yitabiriwe n’abari mu byiciro birimo Ubuyobozi bw’Ihuriro ry’Ubumwe n’Ubudaheranwa ku rwego rw’Akarere n’umurenge; Ubuyobozi bw’Inama Njyanama ku rwego rw’Akarere; Abarinzi b’Igihango, Ubuyobozi bwa IBUKA, Abahagarariye imiryango ishingiye ku myemerere ku rwego rw’Akarere; n’ahagarariye urwego rw’umudugudu.

Abasenateri bagaragarijwe ibikorwa bitandukanye Akarere gakora mu kurwanya ingengabitekerezo ya Jenoside, no kwimakaza ubumwe n’ubudaheranwa na zimwe mu mbogamizi zikigaragara muri izi gahunda;  n’ingamba ziteganyijwe mu guhangana n’ibyo bibazo. 

Hon. Senateri Murangwa Ndangiza Hadija yagaragaje ko impamvu hashyirwa imbaraga mu kurwanya ingengabitekerezo ya Jenoside no guteza imbere ubudaheranwa bw’Abanyarwanda ari uko hakigaragara ibyaha bifitanye isano nabyo, ati: “Tugomba guharanira ko ibijyanye n’igipimo cy’ubumwe n’ubudaheranwa bigerwaho 100%.”

Muri iyi nama, abari mu byiciro bitandukanye bahawe umwanya uhagije wo kugeza ku basenateri ibyo babona bikabangamira ubumwe n’ubudaheranwa, ibikwiye gukorwa, n’ahakwiye gushyirwa imbaraga.