Kuri uyu wa Kane, tariki 15 Gicurasi mu Murenge wa Musaza habereye igikorwa cyo gufasha abangavu babyariye iwabo guhabwa ubufasha bukomatanyije(GBV Clinic), cyateguwe ku bufatanye bw'Akarere, Vision Jeunesse Nouvelle n'Umuryango Imbuto Foundation.

Ni igikorwa kitabiriwe n’abayobozi barimo Umuyobozi w'Akarere wungurije ushinzwe imibereho myiza y'abaturage Madame Mukandayisenga Janviere, ari kumwe n’Umuyobozi mukuru w’Ibitaro bya Kirehe Dr Niyonkuru Aine Ernest, Ubuyobozi bw’Umurenge wa Musaza, abahagarariye Vision Jeunesse Nouvelle, na Imbuto Foundation n’abandi.

Muri iki gikorwa hatangiwe serivisi zirimo gupima abana imirire bigakorwa n'abajyanama b'ubuzima, serivisi zitangwa na RIB na Isange, serivisi z'ubuzima gupima HIV, kwipimisha inda, kuboneza urubyaro, na serivisi z'irangamimerere. 

Mu butumwa yagajeje ku bitabiriye iki gikorwa barimo abangavu babyariye iwabo bari baherekejwe n’ababyeyi babo, yabasabye kudatererana abahohotwe, ubufatanye mu gukumira no kwirinda ihohoterwa no kujya batangira amakuru ku gihe kugira ngo hakumirwe ibyaha by’ihohoterwa bitaraba.

Yababwiye ko kandi mu gihe hari ukorewe ihohoterwa akwiye kwihutira kubimenyesha inzego z’ubuyobozi no kudahishira abakora ihohoterwa. Asaba n’abangavu batewe inda kwihutira gusubira mu mashuri bakiga kuko baba bakiri bato; kandi bagomba gukomeza bagutegura neza ejo hazaza habo n’ahabana babo. Ndetse yibutsa ko Leta yashyizeho ingamba no kurwanya no gukumira ihohoterwa harimo no guhana hakurikijwe amategeko abakora icyaha cyo guhohotera.