Ku gicamunsi cyo kuri uyu wa Mbere tariki 30 Kamena 2025, Umuyobozi w’Akarere Bwana Rangira Bruno, komite nyobozi, n’inzego z’umutekano bifatanyije n’abagize urugaga rw’abikorera mu karere-PSF Kirehe mu gikorwa cyo kwibuka ku nshuro ya 31 Jenoside yakorewe Abatutsi mu 1994, by’umwihariko abari abikorera, abacuruzi bazize Jenoside.

Ni igikorwa cyabimburiwe n’urugendo rwo kwibuka kuva mu mujyi wa Nyakarambi kugera ku rwibutso rwa Kirehe i Nyakarambi, no kunamira imibiri isaga ibihumbi 12 ishyinguye mu cyubahiro muri uru rwibutso.

Umuyobozi wa PSF mu Karere ka Kirehe Bwana Ndungutse Jean Bosco, yavuze ko impamvu bafata umwanya wo kwibuka nk’abikorera by’umwihariko ari ukugira ngo bazirikane ubugome ndengakamere Jenoside yakorewe Abatutsi bakoranywe, no gukuramo amasomo n’ingamba byo guharanira ko Jenoside itazongera kubaho ukundi; ndetse no kwigisha abakiri bato amateka nyakuri ya Jenoside yakorewe abatutsi.

Perezida w'Umuryango IBUKA mu karere Bwana Nduwimana Bonaventure, yavuze ko kwibuka nk’abikorera by’umwihariko ari umwanya wo kunenga bamwe mu bari abikorera batatiriye igihango bagakora Jenoside abandi bagatera inkunga igikorwa kibi cya Jenoside yakorewe abatutsi. Asoza ashimira  Ingabo zari iza RPA Inkotanyi zahagaritse Jenoside yakorerwaga Abatutsi.

Mu ijambo yagejeje ku bitabiriye iki gikorwa, Umuyobozi w’Akarere Bwana Rangira Bruno yihanganishije abarokotse Jenoside yakorewe Abatutsi, ashimira abikorera bo muri aka karere ku bikorwa bakora bifata mu mugongo abarokotse Jenoside birimo kubaremera, aho bamaze koroza inka abarenga 50, kubasanira amazu; no mu bindi bikorwa byo kubaka no guteza imbere Igihugu.

Yasabye ko igikorwa nk’iki PSF yashyiraho uburyo cyajya kibera no ku rwego rw’umurenge. Abasaba ubufatanye mu kurwanya ingengabitekerezo ya Jenoside, no kutemerera n'uwo ari we wese washaka dusubiza mu mateka mabi; bakajya batanga amukuru kugira ngo bikumirwe kare.