Abarimo abayobozi ba PAM (Pan African Movement Rwanda) batowe ku rwego rw’Akarere, Biro za PAM ku rwego rw’imirenge igize Akarere bahuguriwe mu cyumba cy’inama cy’Akarere ka Kirehe kuri uyu wa Gatandatu tariki 10 Gicurasi 2025, bahuguwe ku mikorere n’imikoranire y’inzego z’uyu muryango, intego n’icyerekezo.

Umuryango Uharanira Agaciro n’Iterambere by’Umunyafrika n’abafite inkomoko muri Afurika, Pan Africa Movement(PAM), Abagize komite nshya zawo zatowe mu Karere bagaragaje ko ibyo u Rwanda rumaze kugeraho ari urugero rwiza ku bindi bihugu bya Africa bishaka kwigenga kuzuye no kwigira.

Bamwe mu bagize Komite ya ‘Pan African Movement’ babwiye Itangazamakuru ko bakurikije intego zayo, u Rwanda rukataje mu kuzishyira mu bikorwa bakemeza ko n’ibindi bihugu bya Africa hari ibyo bikwiye kurwigiraho.

Munezero Esther, Umunyamabanga wa ‘Pan African Movement’ mu Murenge wa Musaza yagize ati: “Nkurikije intego dufite mbona bishoboka ko byagerwaho twese dushyize hamwe, u Rwanda tumaze kugera kure hari byinshi byakozwe harimo; guteza imbere umuturage, kurwanya ruswa n’akarengane no kwakira neza abanyamahanga baza batugana, ibyo rero bikwiye kubera urumuri ibindi bihugu duturanye.”

Gasana Samuel, Umuyobozi wa ‘Pan African Movement’ mu Murenge wa Kigina yagize ati: “U Rwanda ni Igihugu cyohereza ingabo gucunga umutekano mu bindi bihugu bya Africa, ibindi bihugu nabyo bikwiye kwigira kuri iki kintu. Mu myaka myinshi u Rwanda hari urwego tugezeho kandi rukomeye navuga ko u Rwanda ari umunyu wa Africa; kuko kuri ubu twunze ubumwe dufite umutekano ibintu biri hake muri Africa.”

Umunyamurwango wa ‘Pan African Movement mu Rwanda, Bwana Wamala Wilson wo muri Komisiyo y’ubukungu ari na we wahaye amahugurwa aba bayobozi baherutse gutorwa mu avuga ko Igihugu cy’u Rwanda rushyiraho intego zihamye by’izo Africa yifuza kugeraho.

Yagize ati: “Buri gihugu gishyiraho intego zacyo, u Rwanda rwashyizeho intego rwifuza, kandi izo ntego ni nazo Afurika yifuza kugeraho, ibyo rero tugomba kubikomeza tutitaye ku cyo ibihugu byo mu burengerazuba bw’Isi bibitekerezaho; cyane ko ari bo usanga barwanya iterambere rya Africa no kwigenga byuzuye.”

Umuyobozi wa ‘Pan African Movement’ mu Karere ka Kirehe, Bwana Nzirabatinya Modeste, avuga ko nubwo hari ibyo u Rwanda rumaze gukora kandi bigaragara hakiri urugendo rurerure.

Yagize ati: “Hakenewe ubukangurambaga nk’aba ‘Pan African Movement’ kubera ko ntabwo byumvikana ukuntu umuntu ajya kurwanya igihugu cye. Ikindi dukwiye kureba aho tuvuye, kubera ko mu Rwanda turi urugero rwiza kurenza abandi banyafurika. Ibyo kandi bigaragarira ku ngabo zacu zijya gucunga umutekano mu bindi bihugu.”

Abanyamuryango ba PAM basabwe kuzitabira inama ya Kongere ya 4 nkuru ya PAM izaba ku tariki ya 25 Gicurasi 2025 i Kigali,  ndetse ikazaba ari nawo munsi uzihizirizwaho umunsi wo kwibohora kwa Afurika.