Kuri uyu wa Gatatu tariki 28 Gicurasi 2025, Umuyobozi w’Akarere Bwana Rangira Bruno ari kumwe n’inzego zitandukanye z’Ubuyobozi mu Karere yakiriye Abadepite mu Nteko ishinga Amategeko y’u Rwanda bari mu ruzinduko rugamije gukurikirana imikorere n’imikoranire y’inzego z’imitegekere y’Igihugu zegerejwe abaturage n’izindi nzego mu gutanga serivise ku baturage. 

Ni Itsinda ry’Abadepite riyobowe na Hon.Uwiringiyimana Philbert, aho ari kumwe Hon. Kayitesi Sarah na Hon. KANYANGE Phoebe bari muri gahunda yo gukurikirana ibikorwa bigamije impinduka nziza mu mitangire ya serivise. 

Mu biganiro bagiranye n'Ubuyobozi bw'Akarere bagaragarijwe uko ibibazo abaturage bagejeje ku Badepite mu ngendo rusange ziheruka zakorewe mu karere muri Mutarama - Gashyantare 2025 byakemuwe. Uburyo bukoreshwa mu gukumira no gukemura ibibazo mu bwumvikane, uruhare rwa buri rwego rufite inshingano zo gukemura ibibazo by'abaturage (Umudugudu, Akagari, Umurenge, Akarere) n’uruhare rw’izindi nzego cyangwa forums zifashishwa n’ubuyobozi (inteko z'abaturage, Abunzi, abahesha b’inkiko b’umwuga n’abatari ab’umwuga, MAJ, Inama Ngishwanama zo kurwanya ruswa n’akarengane, Umugoroba w'imiryango,....);

Abadepite bagejejweho kandi ishusho rusange ku irangizwa ry’imanza zaciwe n’Inkiko zisanzwe, Inkiko Gacaca n’imyanzuro y’Abunzi ;gahunda zihari zigamije kunoza imitangire ya serivisi ku bagana inzego za Leta, ikoranabuhanga ryifashishwa n’inzego za Leta mu guha serivisi abaturage (serivisi z’ubutaka, imyubakire, irangamimerere, kurangiza imanza, umutekano no mu kwakira ibindi bibazo abaturage bageza ku buyobozi n’inzego zitandukanye, etc...).

Muri uru ruzIndo Abadepite bazasura n'abaturage mu mirenge itandukanye bagirane nabo ibiganiro.