IBIRORI BYO KWIZIHIZA UMUGANURA 2026 BYABEREYE I MUSHIKIRI, ABATURAGE BASABWE KWISHIMIRA IBYAGEZWEHO BARUSHAHO GUKORA NEZA

Kuri uyu wa Gatanu tariki 07 Kanama 2026, mu Murenge wa Mushikiri ni ho ku rwego rw'Akarere hizihirijwe umunsi mukuru w'Umuganura, aho Umuyobozi w'Akarere Bwana Rangira Bruno n'abagize Komite Nyobozi y'Akarere, inzego z'umutekano n'abafatanyabikorwa bifatanyije n'abaturage hatangwa ubutumwa bwo kwishimira ibyagezweho no gufata ingamba zo kurushaho gukora neza; gusigasira umuco Nyarwanda; no kwirinda ibinyobwa bitujuje ubuziranenge.

Ni umunsi ku rwego rw’Akarere, wizihirijwe mu Kagari ka Rwayikona mu Murenge wa Mushikiri, ku nsanganyamatsiko igira iti “Umuganura, isoko y’ubumwe n’ishingiro ryo kwigira.”

Mu byaranze ibirori byo kwizihiza Umuganura mu Murenge wa Mushikiri harimo gutaha ikiraro gihuza ibice by'Umurenge wa Mushikiri n'iby'Umurenge wa Rukira wo mu Karere ka Ngoma cyubatswe ku bufatanye bw'abaturage mu rwego rwo kwishakamo ibisubizo, kumurika umusaruro abahinzi bagezeho aho bagaragaje ko bavuye ku gitoki gipima ibiro 12 bakagera ku gipima ibiro 100; koroza inka eshatu imiryango itatu  mu rwego rwo kuyifasha kwiteza imbere, ibikorwa bitandukanye mu rwego rwo gusigasira umuco Nyarwanda nk'uko bateguraga umutsima w’amasaka, gusya, gusekura, ibikorwa Umwami w’u Rwanda yakora ku Umuganura, guha abana amata, imbyino gakondo n’imikino mu mivugo n’ibyivugo.

Ubuyobozi n’abaturage banasangiye ku musaruro wejejwe, hishimirwa ibyiza byagezweho mu rwego rw’ubuhinzi n’ubworozi n’ahandi binyuze mu ndirimbo, hatangwa ubukungurambaga bwo guhangana n’inzoga z’inkorano zitujuje ubuziranenge, abacunga umutekano(abanyerondo) bahawe imyambaro ibaranga n’ibindi bikorwa bitandukanye.

Mu butumwa Umuyobozi w'Akarere Bwana Rangira Bruno yagejeje ku baturage yababwiye ko Umuganura ari umwanya wo kwishimira ibyagezweho no gufata ingamba zo kurushaho gukora neza kandi cyane no kwibuka gusigasira ibyagezweho abasaba kwirinda inzoga n'ibinyobwa bitujuje ubuziranenge.

Habayemo igikorwa cyo gutaha ku mugaragaro ikiraro cyubatswe ku bufatanye bw'abaturage muri Mushikiri

Ikiraro cyashywe ku mugaragaro

Imiryango itatu yorojwe inka mu rwego rwo kubafasha kwiteza imbere

Habeyeho no kwishimira umusaruro wabonetse no gusangira

Hakozwemo n'ibikorwa bitandukanye byo gusigasira umuco Nyarwanda

Umuyobozi w'Akarere Bwana Rangira Bruno yasabye abaturage kwishimira ibyagezweho no gufata ingamba zo kurushaho gukora neza; gusigasira umuco Nyarwanda; no kwirinda ibinyobwa bitujuje ubuziranenge.